Psa 71 | YomNWM | STEP | Mu ngeyo, a Yave, ndisuamina kadi tala ti ndifua tsoni kadi khumbu yimosi !

Psalms 71

Kadi kundiekula mu bununu buama

1 Mu ngeyo, a Yave, ndisuamina
kadi tala ti ndifua tsoni kadi khumbu yimosi !
2 Wukhudi ayi wuphukisa mu busonga buaku
balula dikutu diaku kuidi minu ayi phukisa.
3 Ba ditadi diama diodi di kutsuekanga ;
momo ndilenda kuenda mu zithangu zioso
vana lutumunu mu kuphukisa
bila widi ditadi diama
ayi tinunu kiama ki ngolo.
4 Wukhudi Nzambi ama mu mioko mi batu bambimbi ;
mu mioko mi batu bamvanganga mambimbi ayi mu batu badi tsita.
5 Bila ngeyo wuba diana diama, a Yave,
ngeyo wumvanganga moso wuzodidi.
Diana diama tona mu bumuana buama.
6 Tona ndibutuka, mu ngeyo ndieti singimina ;
ngeyo wuthotula tona mu vumu ki ngudi ama ;
Ngeyo ndiela zitisanga mu zithangu zioso.
7 Ndieka banga diambu di siminina kuidi bawombo,
vayi ngeyo suamunu kiama kingolo.
8 Munu ama widi wuwala mu nzitusu aku
wunyamikisa kiezila kiaku mu lumbu kimvimba.
9 Kadi kundoza mu thangu ndieka nunu ;
kadi kundiekula mu thangu zingolo ziama zilembu suki !
10 Bila bambeni ziama zilembo thubidila
bobo balembo tombi kuphonda, balembo wizana va kimosi,
11 balembo tubi : “Nzambi wunyekudi,
nlandakananu,
bila kuisi ko mutu wufueti ku nkula.”
12 Kadi ba thama ayi minu, a Nzambi,
yiza nsualu Nzambi ama mu kutsadisa !
13 Bika mimfundi miama mibungana mu tsoni ;
bika bobo bantomba kuphanga phasi baba ba lenzo ayi dio kombolo.
14 Vayi kuidi minu, ndiela tulanga kaka diana mu zithangu zioso
buela kuzitisanga ngolo.
15 Munu ama wela yolukila busonga buaku
ayi phulusu aku mu lumbu kimvimba,
bila ndikadi zaba tezo biawu.
16 Ndiela kuiza ayi yamikisa mavanga maku ma lulendo ;
a Yave, mutu wumvanganga makazodidi
ndiela yamikisa busonga buaku ; busonga buaku kaka.
17 Tona mu bumuana buama, a Nzambi, ngeyo wundonga
ayi ye lumbu kiaki yayi ndinyamikisanga matsiminanga maku.
18 Bobuawu, bu ndiela nuna ayi zitsuki ziphembi
kadi ku ndiekula, a Nzambi.
Muingi nditubila lulendo luaku kuidi tsungi yinkuiza,
zingolo ziaku kuidi babo bela kuiza.
19 Busonga buaku buntula nate ku diyilu, a Nzambi.
Ngeyo wuvanga mambu manneni ;
nani a Nzambi widi banga ngeyo e ?
20 Ngeyo wumbonisa ziphasi ziwombo ayi zindudi ;
wela buela kuphutudila luzingu ;
tona ku tsi ntoto, ngeyo wela buela kuthotula.
21 Wela buela wokisa nzitusu ama,
ayi buela ku khindisa diaka.
22 Ndiela kuzitisa mu ngitala
mu diambu di kikhuikizi kiaku, a Nzambi ama ;
ndiela kuyimbidila minzitusu mu Lila.
Ngeyo nlongo wu Iseli.
23 Bididi biama biela yimbila mu diambu di khini
mu thangu ndiela kuyimbidila minzitusu,
minu mutu wowo wukula.
24 Ludimi luama luela yolukila mavanga maku masonga
mu lumbu kimvimba,
Bila bobo bantomba kumbonisa phasi
bela fua tsoni ayi bela ba dio kombolo.